၂၀ ကြိမ်မြောက် တနင်္လါ

သြဂုတ် ၁၅ ရက်။

ရှင်မဿဲ၊၁၉ ၁၆ - ၂၂။

လူငယ်သူကြွယ်ကလေးရဲ့ အမေး

ထာဝရ အသက်ရဖို့ ဘာလုပ်ရမလဲ။ဥစ္စာရှိ၊ပျိုရွယ်၊ကျန်းမာသူ၊လောကအမြင် ပြည့်စုံ၊အားကျစရာ။လိုလေသေး မရှိသူ လို့ မြင်မယ်။နှလုံးသားထဲ၊နက်ရှိုင်းနေရာက၊လိုအပ်နေတဲ့အရာ၊သူဘဲသိနေတယ်၊သခင်ထံပါး ချဥ်းကပ်ပြီး မေးတယ်။တို့များတစ်ဦးစီလည်း မဖြစ်မနေမေးရမဲ့၊မေးခွန်း၊ ရှောင်လွဲမရတဲ့၊မေးခွန်းပါ။လက်ရှိလောက လူတွေပိုင်ဆိုင်တဲ့ အရာတွေထက် သာလွန်၊ပြည့်ဝ စုံလင်တဲ့ထာဝရအသက်ကို ရဖို့ဘာလုပ် ရမလဲ၊အမြဲမေးနေရမဲ့မေးခွန်းပါ။လူရွယ်လေးက ပြည့်စုံကြွယ်ဝမှုနဲ့လူ့ကျင့်ဝတ် အကြား၊အဆက်သွယ်ကိုအသေချာ သတိထားမိတယ်။ ဂျူး ဖြစ်ပြီး ဘုရားအဆုံးမအောက်မှာ တည်နေတဲ့သူပါ၊မသိလို့မေးတာမဟုတ်ဘဲ၊ သခင်က သူ့ကိုတစ်နည်းနည်းနဲ့ ဆွဲဆောင်နေလို့ ဖြစ်တယ်၊ ဒီလိုမေးစေဖို့ သူ့ကို နိုးဆော်တယ်။သခင်ကိုယ်တိုင်က၊ဘုရားနိုင်ငံတော်နီးလာပြီ၊ နောင်တယူပြီး ဧဝံဂေလိတရားတော် ယုံကြည်ကြလော့၊ လို့ဟောပြောတယ်၊ဒီပုဂ္ဂိုလ်က သူ့ကိုဆွဲဆောင်နေတယ်၊သခင်နဲ့ နီးစပ်လိုစိတ်ပြင်းပြခဲ့တယ်။ သခင်က ဥပဒေပညတ်ထက် ကျော်လွန်တဲ့ အချက်ထောက်ပြတယ်၊။

ပညတ်ချက်များကို လိုက်နာနေထိုင်တဲ့ပြင်၊ဘုရားရှင်ထံ ဆက်ကပ် မှုကိုပိုလို့ ပြည့်စုံစေနိူင်ရန်ရည်ညွှန်းပြသ ခဲ့ခြင်း ဖြစ်တယ်။ဘဝရဲ့ ပုံစံ နှစ်မျိုး ယုံကြည်သူတို့မှာရှိကြတယ်၊ သာမန် ပညတ်တော်များလိုက်နာ ကျင့်ကြံရုံ ဖြင့် ထာဝရသက်ရယူဖို့၊ တစ်မျိုးက ရှိသမျှအကုန်လုံးကို ဆက်ကပ်ပူဇော်ပြီး၊နောက်လိုက်ခြင်း၊ သီးခြားခွဲထွက်ဘဝ အသက်ရှင်ခြင်း ပုံစံမျိုး ဖြစ်ကြတယ်။ကယ်တင်ရှင် နောက်လိုက်ရန်တွက်၊စိတ်ပိုင်းဖြတ်ဖို့၊ ဖိတ်ခေါ်ခြင်းပါ။ဒါက ကြွယ်ဝ လူရွယ်တွက် ကြီးမားတဲ့ စိန်ခေါ်မှုဖြစ်တယ်။

ရောမ ကိုလိုနီ ပါလက်စတိုင်းနယ်မှာချမ်းသာတယ်လို့ သတ်မှတ်ခံရသူ၊တော်ရုံ ချမ်းသာလို့တော့ သတ်မှတ်မခံရပါ၊ အများကြီး ချမ်းသာလို့သာ၊ချမ်းသာသူ သတ်မှတ်ခံရတယ်၊သခင်ရဲ့ သွန်သင်ချက်က လူသားအားလုံး ဝိညာဥ်ရေးအရ လောကကိုတပ်မက်ခြင်းမရှိဘဲဘုရားနိူင်ငံတော်ဦးတည်စိတ်နဲ့ စွဲလန်းနေထိုင်အသက်ရှင်ဖို့ ဖြစ်တယ်။ သူကြွယ်လူရွယ်လေးဟာ ပိုကောင်းတာကို လိုချင်နေပေမဲ့လည်း၊ သူ့ရဲ့ပိုင်ဆိုင် ကြွယ်ဝမှုကို စွန့်ပယ်ဖို့ လိုတဲ့အခါ၊ ပြည့်ဝစုံလင်တဲ့ ဘဝ သူပိုင်ဆိုင်ဖို့ ခက်ခဲ လာတာကို သိလိုက်ရပါတယ်။

ဒီသွန်သင်ချက်ကဆင်းရဲတာကောင်းတယ်၊ တွယ်ဖက်ကြပါ လို့ မဆိုလိုပါ၊ကြွယ်ဝတာကောင်းတယ်၊ အဲ့ဒီကြွယ်ဝမှုဟာ၊ ဘုရားနောက်လိုက်ဖို့ အဆီးအတား ဖြစ်နေရင်၊အနှောင့်ယှက် ဖြစ်နေရင်၊ ဒါကိုစွန့်လွှတ်ရဲဖို့ လိုပါမယ်။လူရွယ်ဟာသူ့ကြွယ်ဝမှုကို စွန့်လွှတ်ဖို့မဖြစ်နိူင်သေးတာတွေ့ရတယ်၊အားလုံးစွန့်ပြီးလိုက်ခဲ့ကြတဲ့ တမန်တော်များလို သူမစွန့်နိူင်သေးပါ။သူက ဝမ်းနည်းပြီးအဝေးသို့ တစ်ရွေ့ရွေ့ထွက်ခွာသွားတယ်လို့ ဖတ်ရပါတယ်။အံ့သြစရာမဟုတ်ပါ။ သူမှာလွတ်လပ်စွာရွေးခြယ်ခွင့် ရှိနေတယ်၊ ကြွယိဝမှုစွန့်ပြီးသခင့်နောက် လိုက်မလား၊ ကြွယ်ဝမှုဆုပ်ကိုင်ပြီး အဝေးထွက်သွားမလား၊ဒီလို စိန်ခေါ်တဲ့ ခေါ်တော်မူခြင်းမျိုး၊အစီစီ မြို့က ဖရန်စစ်ကို ခေါ်ခဲ့တယ်အားလုံးစွန့်ပြီး သခင့်နောက်လိုက်ခဲ့လို့ စိန့် တစ်ပါး ဖြစ်လာတယ်။တို့တွေ တစ်ယောက်စီ ပြန်စဥ်းစား၊သခင့်နောက်လိုက်ဖို့၊ရှိသမျှစွန့်လွှတ်ဆက်ကပ် လိုက်တာမျိုး၊ နောက်ပညတ်တော်များ လိုက်နာစောင့်ထိန်းတာမျိုး၊ နှစ်မျိုးလုံးမှာ ကိုယ်လိုက်နာလုပ်ဆောင်နိူင်တာကို ပီပြင်အောင်လုပ်ဖို့အရေးကြီးတာ ဖြစ်လို့၊အပီပြင်ဆုံး လုပ်ဆောင်နိူင်ကြဖို့အတွက်၊လိုအပ်ကျေးဇူးတောင်းခံကြစို့။ခွန်အား၊ အသက်၊ ရကြစေ။အသီးကောင်းများ သီးစေ။

Fr.Florence Aung Kyaw Oo ရဲ့ သြဝါဒကို ဝေမျှသည်