ဝိညာဉ်တော်မြတ်ကို စေလွှတ်တော်မူလျှင်ဘာသာဝင်တို့၏စိတ်နှလုံးတို့သည် သန့်ရှင်းစင်ကြယ်ခြင်းသို့ရောက်ပါလိမ့်မည်။ ဒီဆုတောင်းပဌနာစာသားဟာ ဆာလံ ၁၀၄: ၃၀ ကနေယူထားတာဖြစ်တယ်။

“တစ်ဖန်ဝိညာဉ်တော်ကို စေလွှတ်၍ သူတို့ကိုဖန်ဆင်းတော်မူသဖြင့် မြေကြီးမျက်နှာပြင်ကို အသစ်ပြုပြင်တော်မူ၏။

လူသားတွေနဲ့မြေကြီးဟာ နီးစပ်စွာဆက်နွယ်နေတယ်။ လူသားတွေရဲ့ စိတ်နှလုံးလှပမှ ကမ္ဘာမြေလှပမှာဖြစ်တယ်။ လူသားတွေရဲ့ နှလုံးသားမျက်နှာပြင်သန့်စင်မှ ကမ္ဘာမြေမျက်နှာပြင် သန့်စင်မှာဖြစ်တယ်။ မြေမျက်နှာပြင်ကို ကြည့်ရင် နှလုံးသားမျက်နှာပြင်ကို မြင်နိုင်တယ်။ ပြာကျတာတွေ မသာချတာတွေများနေရင် နှလုံးသား မျက်နှာပြင်ကြမ်းနေတယ်ဆိုတာ သိသာတယ်။

ကမ္ဘာဦးကျမ်း ၆း ၁၂ မှာ “ဘုရားသခင်သည် မြေကြီးကို ကြည့်ရှုသောအခါ ပုပ်စပ်လျက်ရှိသည်ကို မြင်တော်မူ၏။ အကြောင်းမူကား မြေပေါ်မှာ လူအပေါင်းတို့သည် ဖေါက်ပြန်ခြင်းသို့ရောက်ကြပြီ” လို့ ရေးထားတယ်။

လူတွေက မဟုတ်မဟတ်တွေလုပ်လို့ မြေကပုပ်စပ်နေတာ။ လူတွေတရားပျက်လို့ ကမ္ဘာမြေအဖျားတက်နေတာ။ လူတွေဖောက်ပြန်တော့ ရာသီတွေလည်းဖောက်ပြန်နေတာ။

မြေမှုန့်ကလာတဲ့လူသားတွေက စိတ်ထားပုပ်စပ်တဲ့အခါ မြေကြီးလည်း ပုပ်စပ်လာတယ်။ လူသေကောင်တွေ တိရိစ္ဆာန်အသေကောင်တွေနဲ့ပြည့်လာတယ်။

နေဧလက်ထက်မှာ ရေလွှမ်းမိုးစေခြင်းအားဖြင့် ကမ္ဘာမြေကို ‌ဆေးကြောသန့်စင်ခဲ့တယ်။ ဒါပေမဲ့ လူသားတွေရဲ့ စိတ်ထားက သန့်စင်မှုအပြည့်အဝမရှိခဲ့ဘူး။ ဘာသဲလ် ရဲတိုက်ကြီးတွေဆောက်ရင်းနဲ့ သဘောထားကွဲစကားပါကွဲပြီး လူတွေပါကွဲကုန်ကြတယ်။ အချင်းချင်းနားလည်မှုမရှိကြတော့ဘူး၊ စိတ်ဝမ်းကွဲကုန်ကြတော့တယ်။

ဆိုးသွမ်းတဲ့ကမ္ဘာကြီးဟောင်းနွမ်းတဲ့ကမ္ဘာကြီးကောင်းခန်းရောက်ဖို့ရာ ဝိညာဉ်တော်ပါမှ ဖြစ်မှာ။ အသစ်တစ်ခုအစပြုတိုင်း သန့်ရှင်းသောဝိညာဉ်တော်ပါတယ်။

ဖန်းဆင်းခြင်းအစမှာ ဝိညာဉ်တော်ပါတယ်။ ကမ္ဘာဦးကျမ်း ၁း ၂ မှာ “မြေကြီးသည် အဆင်းသဏ္ဌာန်မရှိလွတ်လပ်လဟာဖြစ်၏။ နက်နဲရာအရပ်ကို မှောင်မိုက်ဖုံးလွှမ်း၍ ဘုရားသခင်၏ ဝိညာဉ်တော်သည် ရေမျက်နှာပြင်ပေါ်မှာ လှုပ်ရှားတော်မူ၏” လို့ရေးသားထားပါတယ်။

လူမျိုးတော်ကို ဖွဲ့စည်းပုံအသစ်နဲ့ အုပ်ချုပ်ဖို့ ခေါင်းဆောင်လူကြီးကိုယ်စားလှယ် (၇၀) ဦးကိုရွေးချယ်ပြီး ဆုတောင်းတဲ့အခါ သူတို့အပေါ်သန့်ရှင်းသောဝိညာဉ်တော်ဆင်းကြွလာပြီး ပရောဖက်ပြုပြီးဟောပြောကြတယ်ဆိုတဲ့အကြောင်း တောလည်ရာကျမ်း ၁၁း ၂၅ မှာ မှတ်တမ်းထားတယ်။

ဓမ္မသစ်ရဲ့အစ ပဠိညာဉ်သစ်ရဲ့အစမှာသားတော်ဘုရားလူ့ဇာတိအဖြစ်ကို ယူခြင်းမှာလည်း ဝိညာဉ်တော်ဘုရားပါတယ်။ “ဤအမှုအရာသည် အဘယ်သို့ဖြစ်နိုင်မည်နည်း။ ကျွန်မသည်ယောင်္ကျားမရှိပါ” လို့ကညာစင်မာရီယားကပြောတဲ့အခါ ကောင်းကင်တမန်က “ဝိညာဉ်တော်မြတ်သည် သင့်အပေါ်သို့ ဆင်းသက်လိမ့်မည်။ အမြင့်ဆုံးသောအရှင်၏တန်ခိုးတော်သည် သင့်ကိုလွှမ်းမိုးလိမ့်မည်။ ထို့ကြောင့်သင်မှဖွားသော သူငယ်သည် သန့်ရှင်းမွန်မြတ်ပြီး ဘုရား၏သားတော်ဟု ခေါ်ဝေါ်ခြင်းခံရလိမ့်မည်”လို့ ပြန်ပြောတာကို ရှင်လူကား ၁း ၃၅ မှာ တွေ့ရတယ်။

ဒေသနာတော်ဟောကြားခြင်းကို အစပြုဖို့ ဆေးကြောခြင်းခံတဲ့အခါမှာလည်း ကောင်းကင်ဖွင့်လှစ်ပြီး သန့်ရှင်းသောဝိညာ်တော်သည် ချိုးငှက်ကဲ့သို့ ကိုယ်ထင်ရှားလျှက်ကိုယ်တော့်အပေါ်၌ဆင်းသက်တော်မူ၍သင်ကားငါနှစ်သက်မြတ်နိုးရာငါ၏ချစ်သားပေတည်းဟု ကောင်းကင်အသံတော်ဖြစ်လေ၏” လို့ ရှင်လုကား ၃း ၂၁-၂၂ မှာရေးသားထားပါတယ်။

အသစ်သောလူမျိုးတော်ြဖစ်တဲ့အသင်းတော်ကြီး စတင်ဖြစ်တည်တဲ့နေ့၊ ပင်တေကောစ်နေ့မှာတပည့်တော်များရှေ့တွင်လျှာပုံသဏ္ဌာန်ရှိသောမီးလျှံငယ်များထွက်ပေါ်လာ၍ သူတို့အသီးသီး၏အပေါ်၌တည်လေ၏”လို့ တမန်တော်ဝတ္တု ၂း ၃ မှာရေးသားထားပါတယ်။ အဲဒီနေ့မှာ ဘာသာစကားကွဲပြားမှုတံတိုင်းကို ဝိညာဉ်တော်ဘုရားက ဖြိုလိုက်တယ်။  တပည့်တော်ကြီးများဟောကြားတဲ့စကားကို လူမျိုးခြားတွေကသူတို့ဘာသာစကားနဲ့ နားလည်ကြတယ်။ အဲဒီနေ့မှာ လူပေါင်း သုံးထောင် ဆေးကြောခြင်းခံကြတယ်။ လူမျိုးစုံပါဝင်သော ဘုရားသခင်ရဲ့အသစ်သော လူမျိုးတော်ဖြစ်လာတဲ့နေ့ပါပဲ။ မြေမျှက်နှာပြင်အသစ်ပြုပြင်တဲ့နေ့ပါပဲ။

ခရစ်ယာန်တရားတော်ကြောင့် ကမ္ဘာမြေမျက်နှာပြင်ပိုပြီးလှပတိုးတက်လာခဲ့တယ်။ ကြမ်းတမ်းခက်ထန်တဲ့ ဥရောပသားတွေသိမ်မွေ့လာခဲ့တယ်။ ကျွန်စနစ်တွေ ပပျောက်သွားတယ်။ ကရုဏာလုပ်ငန်းတွေများလာတယ်။ ရသေ့ကျောင်းကစပြီး သိပ္ပံပညာရပ်တွေ သင်ကြားပို့ချပေးတဲ့အတွက် ပညာတတ်တွေများလာတယ်။ ပညာတွေတီထွင်မှုတွေအားလုံးဟာ ဝိညာဉ်တော်ရဲ့ အလင်းကျေးဇူးတော်ကြောင့်ဖြစ်တယ်။

လူသားတွေရဲ့စိတ်နှလုံးလှပလာသည်နှင့်အမျှ ကမ္ဘာမြေမျက်နှာပြင်လည်း သာယာလှပလာမှာဖြစ်တယ်။ အဲဒီစိတ်နှလုံးမျက်နှာပြင်ကို အသစ်ပြုပြင်ဖို့ သန့်ရှင်းသော ဝိညာဉ်တော်ကို မကြာခဏ ဖိတ်ခေါ်ရမှာဖြစ်တယ်။ ဝိညာဉ်တော်က ပြင်ဆင်ပေးတယ်ဆိုရင် နှလုံးသားမျက်နှာပြင်ဟာ ကောင်းတဲ့မြေဆီလွှာဖြစ်လာပြီးနုတ်ကပါတ်တော်မျိုးစေ့ရှင်သန်ပေါက်ရောက်နိုင်မှာဖြစ်တယ်။ ဒီအခါမှာ ဝိညာဉ်တော်ရဲ့ အသီးအပွင့်တွေ ဝေဆာသီးပွင့်လာပြီးအဆပေါင်းများစွာတိုးပွားလာမှာဖြစ်တယ်။

ဝိညာဉ်တော်ရဲ့ အသီးအပွင့်များကို ဂလာတိဩဝါဒစာ ၅း ၂၂ မှာ ပြောထားပါတယ်။ ဝိညာဉ်တော်၏အသီးအပွင့်များသည်ကား ချစ်ခြင်း၊ ဝမ်းမြောက်ခြင်းရွှင်လန်းခြင်း၊ ငြိမ်းချမ်းသာယာခြင်း၊ စိတ်ရှည်သည်းခံခြင်း၊ သနားကြင်နာခြင်း၊ ကောင်းမြတ်ခြင်း၊ သစ္စာရှိခြင်း၊ နူးညံ့သိမ်မွေ့ခြင်း၊ မိမိကိုယ်ကိုချုပ်တီးနိုင်ခြင်းတို့ဖြစ်သည်။

ဝိညာဉ်တော်ဘုရားရဲ့ အသီးတွေသာစိတ်နှလုံးထဲမှာ သီးကြမယ်ဆိုရင် ကမ္ဘာမြေပြင်လည်း သာယာလှပနေမှာ။ ချစ်ခြင်းမသီးဘဲအမုန်းသီးတွေသီးနေကြလို့၊ သီးခံခြင်းအသီးမသီးဘဲ ဒေါသသီးတွေသီးနေကြလို့ ကမ္ဘာကြီးအကျည်းတန်နေတာဖြစ်တယ်။

သနားကြင်နာခြင်းအသီးမသီးဘဲ ရက်စက်ခြင်းအသီးတွေသီး၊ ကောင်းမြတ်ခြင်းအသီးမသီးဘဲ ယုတ်မာခြင်းအသီးတွေသီး၊ သစ္စာတရားအသီးမသီးပဲ မုသားအလိမ်သီးတွေသီးနေလို့ ဒီကမ္ဘာကြီးပျက်စီးနေတာ အရုပ်ဆိုးနေတာဖြစ်တယ်။

အချစ်ရှိတဲ့နေရာမှာ စစ်ဆိုတာမရှိဘူး။ သနားခြင်းရှိတဲ့နေရာမှာ အမှားမရှိဘူး။ အဲဒီအသီး (၉) မျိုးသာသီးကြမယ်ဆိုရင် ကမ္ဘာမြေမျက်နှာပြင် သာယာလှပနေမှာ။

တစ်ခါက ဘုရားစကားကျမ်းစာအတန်းတစ်ခုမှာ ကလေးတွေကို အသီးတစ်မျိုးစီရွေးခိုင်းတယ်။ ဝိညာဉ်တော်အသီးတစ်မျိုးစီနဲ့တူတဲ့မင်းတို့စားနေကျ အသီးတစ်မျိုးကို ရွေးပါ။ ဘာ့ကြောင့်တူလည်းဆိုတာကိုလည်းပြောရမယ်နောလို့ ပြောလိုက်တယ်။

၁။ ကဲ..ချစ်ခြင်းကို ကိုယ်စားပြုတဲ့အသီးတစ်ခုကို ရွေးစမ်းလို့ပြောတော့ ကောင်လေးတစ်ယောက်က စတော်ဘယ်ရီသီးလို့ ထပြောတယ်။ ဘာ့ကြောင့်စတော်ဘယ်ရီသီးကိုချစ်ခြင်းနဲ့ နှိုင်းယှဉ်တာလဲ

ပန်းနုရောင်လေးက ချစ်ခြင်းကို ဖော်ပြသလို ချိုမြတဲ့အရသာက ချစ်ခြင်းကပေးတဲ့ ရသဖြစ်တယ်။ စတော်ဘယ်ရီသီးလေးများကို ဖျော်ကာရယ် အို…တိုက်ပါမယ်ဆိုပြီး ချစ်ခြင်းကို ဖော်ပြတာရှိတယ်။ ဟုတ်ပြီး-ဒါဆိုချစ်ခြင်းကို စတော်ဘယ်ရီသီးလို့မှတ်မယ်။

၂။ ကဲ..ဝမ်းမြောက်ပျော်ရွှင်ခြင်းကို ကိုယ်စားပြုတဲ့အသီးရွေးပါလို့ပြောတော့ နောက်ကောင်လေးတစ်ယောက်လက်ထောင်တယ်။ ငှက်ပျောသီးပါ။ အရင်က ငှက်တွေပျော်လို့ ငှက်ပျော်သီးလို့ခေါ်ရာကနေ ငှက်ပျောသီးဖြစ်လာတာပါ။ ဒါ့ကြောင့်ဝမ်းမြောက်ပျော်ရွှင်ခြင်အတွက် ငှက်ပျောသီးကို ရွေးပါတယ်။ ဟုတ်ပါ့ကွာ..ဝမ်းမြောက်ခြင်းကို ငှက်ပျောသီးလေို့မှတ်မယ်။

၃။ ငြိမ်းချမ်းသာယာခြင်းကို ကိုယ်စားပြုတဲ့အသီးရွေးပါလို့ပြောတော့ ကောင်မလေးတစ်ယောက်က အမြန်ထပြီး ‘ပန်းသီးပါ” လို့ပြောတယ်။ ဘာ့ကြောင့်လဲလို့မေးတဲ့အခါ-ပန်းသီးဆိုတာ ပူတဲ့နေရာမှာမဖြစ်ပါဘူး။ အေးချမ်းတဲ့နေရာတွေ၊တောင်ပေါ်ဒေသတွေမှာပဲ ပေါက်ပါတယ်။ ဒါ့ကြောင့်အေးချမ်းသာယာမှုအတွက်ပန်းသီးကိုရွေပါတယ်။ ဟုတ်ပါ့ကွာ-ငြိမ်းချမ်းသာယာခြင်းအတွက်ဘာအသီးလဲ? ပန်းသီး။

၄။ နောက်တစ်ခုကတော့ စိတ်ရှည်သီးခံခြင်းကို ကိုယ်စားပြုတဲ့အသီးကို ရွေးပါ။ ချက်ခြင်းမဖြေကြဘူး။တစ်အောင့်ကြာတော့ ကလေးမလေးတစ်ယောက်ကပြောတယ်။ ဒူးရင်းသီးပါ။ ဘာ့ကြောင့်လည်းဆိုတော့ ဒူးရင်းသီးစားချင်ရင် ကြွေတာကို စောင့်ရပါတယ်။ သူ့ရဲ့အနှံ့ကို သည်းခံနိုင်မှ အရသာကိုခံစားနိုင်မှာဖြစ်တယ်။ ဟုတ်လိုက်လေကွာ..ဒါဆို စိတ်ရှည်သီးခံခြင်းက ဘာအသီးလဲ? ဒူးရင်းသီး။

၅။ ဒါဆိုသနားကြင်နာခြင်းက ဘာအသီးဖြစ်မလဲ။ ကောင်လေးတစ်ယောက်က ထပြောတယ်။ “စပျစ်သီး။”

သနားခြင်းနဲ့စပျစ်သီးဘယ်လိုသက်ဆိုင်မှုရှိလဲပြောပါအုံး။ကောင်းသောဆာမာရီတန်တစ်ဦးဟာ ဒဏ်ရာနဲ့လဲနေတဲ့သူကို တွေ့တဲ့အခါ ဒဏ်ရာတွေကို စပျစ်ရည်နဲ့ ဆီနဲ့လောင်းပေးတယ်။ သူ့ရဲ့သနားတဲ့စိတ်ကြောင့်ပါ။ ခရစ်တော်ဘုရားကလည်း လူတွကိုသနားလို့ စပျစ်ရည်ကိုသူ့ရဲ့အသွေးတော်အဖြစ် ပြောင်းပြီးတိုက်ကျွေးတာဖြစ်တယ်။ စပျစ်ရည်ဟာ ဘုရားသနားခြင်းကို ဖော်ပြပါတယ်။ ကာနန်မြို့လက်ထပ်ပွဲမှာလည်း သူသနားလို့ ရေကနေ စပျစ်ရည်အဖြစ်ပြောင်းပေးခဲ့တယ်။ မှန်လိုက်တာကွာ..သနားခြင်းကဘာသီးလဲ? စပျစ်သီး။

၆။ နောက်တစ်မျိုးကတော့ ကောင်းမြတ်ခြင်းကို ကိုယ်စားပြုတဲ့အသီးကို ပြောပါအုံး။ကလေးမလေးတစ်ယောက်ပြောတယ်။ မင်းဂွတ်သီးပါ။ ဘာ့ကြောင့်လည်းဆိုတော့ အမြဲတမ်းစားကောင်းတယ်။ good (ဂွတ်) ဆိုတဲ့စကားအတိုင်း အမြဲဂွတ်တဲ့အသီးပါ။သူ့ရဲ့အခွံတောင်မှ  ကျန်းမာရေးအတွက် ဂွတ် (good ) ပါတယ်။ very good ပဲ။ မတွေးမိတဲ့အတွေးပဲ။ ဒါဆိုကောင်းမြတ်ခြင်းကို ကိုယ်စားပြုတဲ့အသီးက ဘာသီးလဲ။ “မင်းဂွတ်သီး။”

၇။ သစ္စာရှိခြင်းကို ကိုယ်စားပြုတဲ့အသီးကို ပြောပါအုံး။ သစ္စာရှိတဲ့အသီးက ဘာအသီးဖြစ်မလဲ? ကောင်လေးတစ်‌ယောက်ထပြောတယ်။ သံပုရာသီးပါ။ သံပုရာသီးနဲ့ သစ္စာရှိတာနဲ့ ဘာဆိုင်လို့လဲ? ဆိုင်တာပေါ့။ သံပုရာသီးက အမြဲချဉ်တယ်။ မချဉ်တဲ့သံပုရာမရှိဘူး။ ငြုပ်သီးတိုင်းမစပ်ဘူး။ လိမ္မော်သီးတိုင်းမချိုဘူး။ သံပုရာသီးတိုင်းချဉ်တယ်။ အဲဒါသူ့ရဲ့သစ္စာတရား။ မပြောင်းလဲတဲ့သဘောတရားဖြစ်တယ်။ ဒီလိုတွေးတော့မှန်လိုက်တာကွာ။ ဒီတော့ သစ္စာတရားအတွက်က ဘာအသီးလဲ? သံပုရာသီး။

၈။ နူးညံ့သိမ်မွေ့ခြင်းကို ကိုယ်စားပြုတဲ့အသီးက ဘာအသီးဖြစ်မလဲ? ကလေးမလေးတစ်ယောက်ကပြောတယ်။ “ကတီဘာသီးပါ။” ကတီဘာသီးရဲ့အခွံက ကတီဘာလိုနူးညံ့တယ်။ မှည့်လို့ကျကွဲတာများတယ်။ အရသာကလည်းမစူးရှဘူး။ ချိုတယ်ဆိုရုံပဲ။ ဒါ့ကြောင့်ကတီဘာသီးကို ရွေးခြင်းဖြစ်တယ်။ ဒီတော့ နူးညံ့သိမ်မွေ့ခြင်းအတွက်က ကတီဘာသီးပေါ့။

၉။ နောက်ဆုံးတစ်မျိုးကတော့ မိမိကိုယ်ကိုချုပ်တည်းနိုင်ခြင်းကိုကိုယ်စာပြုတဲ့အသီးကိုရွေးပေးပါအုံး။

ကောင်လေးတစ်ယောက်ကထဖြေတယ်။ အုန်းသီးပါ။ အုန်းသီးကဘာတွေချုပ်တည်းနိုင်လဲကွ။

ဒီလိုရှိပါတယ်။ အုန်းသီးမှာ ဖြူဖွေးတဲ့အသားနဲ့ ကြည်လင်တဲ့အုန်းရည်ရှိပါတယ်။ ဒါတွေကို ထိန်းသိမ်းကာကွယ်ဖို့ မာကြောတဲ့အခွံပါးတစ်ခုရှိပါတယ်။ နောက်ထပ်အုန်းဆံခွံအထူတစ်ထပ်ရှိပြန်ပါတယ်။ အပေါ်ဆုံးမှာလည်း ခွံမာပါးပါးတစ်ခုရှိပါတယ်။ အောက်ပြုတ်ကျလည်းမကွဲပါဘူး။ ရေထဲကျလည်းမမြုပ်ပါဘူး။သူ့ရဲ့အဖြူရောင်အသားလေးတွေကိ အထပ်ထပ်ကာကွယ်ထားပါတယ်။ ဖြူစင်ခြင်းကို ကာကွယ်ဖို့ဆိုတာလည်း မိမိကိုယ်ကို ချုပ်တည်းခြင်းအထပ်ထပ်အခါခါပြုလုပ်ရပါတယ်။ အတွေး၊အကြည့်၊အပြုအမူအားလုံး၊ အစားအသောက်တွေကိုပါ ချုပ်တည်းရတပါ။ ဒါ့ကြောင့်အုန်းသီးနဲ့တင်စားပြီး ဥပမာပေးတာပါ။ ကောင်းလိုက်တဲ့ဥပမာကွာ..ဒါဆိုရင် မိမိကိုယ်ကို ချုပ်တည်းခြင်းအတွက် ကိုယ်စားပြုတဲ့အသီးက ဘာအသီးလဲ? အုန်းသီး-ဘုန်းကြီးအတွက် အုန်းသီးက စံနမူနာပဲ။

ဒီအသီးတွေကိုသာ နှလုံးသားမျက်နှာပြင်မှာသီးအောင်စိုက်နိုင်ရင် မြေမျက်နှာပြင်ဟာလည်း အသစ်ပြုပြင်ခြင်းသို့ရောက်မှာဖြစ်တယ်။

မြေကို ပြုပြင်ဖို့သန့်ရှင်းသောဝိညာဉ်တော်လိုအပ်သလို နုတ်ကပါတ်တော်အပင်ရှင်သန်ဖို့လည်း ဝိညာဉ်တော်လိုအပ်တယ်။ ဝိညာဉ်တော်ရဲ့အသီးတွေသီးဖို့လည်း ဝိညာဉ်တော်ရဲ့ကူညီမှုလိုအပ်ပါတယ်။

ဘာပဲလုပ်လုပ် ဝိညာဉ်တော်မြတ်ဘုရားကိုဖိတ်ခေါ်ဆုတောင်းပြီးလုပ်ပါ။ထူးခြားတာကို အမှန်တကယ် ကြုံရမှာပါ။ စိတ်ဝိညာဉ်မျက်နှာပြင်အသစ်ပြုပြင်ခြင်းခံရမယ်။

ဝိညာဉ်တော်မြတ်ကို စေလွှတ်တော်မူလျင်ဘာသာဝင်တို့၏စိတ်နှလုံးတို့သည် သန့်ရှင်းဖြူစင်ခြင်းသို့ရောက်ပါလိမ့်မည်။ မြေမျက်နှာပြင်သည်လည်း အသစ်ပြုပြင်ခြင်းသို့ရောက်ပါလိမ့်မည်။

ဆုတောင်းကြစို့

သန့်ရှင်းသောဝိညာဉ်တော်၏အလင်းကျေးဇူတော်အားဖြင့်ဘသာတူအပေါင်းတို့ကိုသွန်သင်တော်မူသောအိုမြတ်စွာဘုရားသခင်၎င်းဝိညာဉ်တော်အားဖြင့်ဖြောင့်မှန်ရာကို နှစ်သက်၍သာယာချမ်းသာခြင်းကို ခံစားအံ့သောငှာ ကျန်ုပ်တို့သခင်ယေဇူး၏ကုသိုလ်တော်အကျိုးဆက်ကိုထောက်၍ကျန်ုပ်တို့အားကယ်မသနားတော်မူပါ။ အာမင်း။

ဆရာတော် မောရစ်ညွှန့်ဝေ

၅ ဇွန်လ၂၀၂၂

ပင်တေကော့တနင်္ဂနွေနေ့