ဒါဟာသခင်ယေဇူးကသူ့ရဲ့တပည့်တော်ကြီးတွေစည်းလုံးခြင်းရှိကြဖို့ ဆုတောင်းပေးတဲ့ဆုတောင်းချက်ကို ကျန်ုပ်တို့ကြားကြရတာဖြစ်ပါတယ်။ တနည်းအားဖြင့်ပြောရရင် သခင်ယေဇူးက စည်းလုံးခြင်း၊ငြိမ်းချမ်းခြင်းကိုလိုလားပြီး ပြိုကွဲခြင်း မငြိမ်မသက်ဖြစ်ခြင်းကိုမလိုလားဘူးဆိုတာကို ပေါ်လွင်စေပါတယ်။ အချင်းချင်းစည်းလုံးရင်ဘုရားဘုန်းဂုဏ်တော်ကို ထင်ရှားစေပြီး အချင်းချင်းဖရိုဖရဲပြိုကွဲနေရင် ဘုရားဘုန်းတော် မှေးမှိန်ပျောက်ကွယ်သွားစေပါတယ်။

Not division but unity ပြိုကွဲခြင်းမဟုတ်စည်းလုံးခြင်းကသာ အင်အားဖြစ် စေသလိုဘုရားလိုလားတဲ့အရာလည်းဖြစ်ပါတယ်။ စည်းနေ လုံးနေရင် ဖြိုခွဲဖို့ခက်သလို ကွဲနေရင် ခွဲဖို့ကအင်မတန်လွယ်ကူပါတယ်။ ဒါကြောင့် သခင်ယေဇူးက ခမည်းတော်၊သားတော်၊ သန့်ရှင်းသောဝိညဉ်တော်ဟာ တစ်လုံးတစ်ဝတည်းရှိသကဲ့သို့ သူ့ရဲ့တပည့်တွေကိုလည်း တစ်လုံးတစ်ဝတည်းရှိစေချင်ခဲ့တယ်။ စည်းလုံးချင်းက ဘုရားတည်ရှိခြင်းအမှတ်လက္ခဏာဖြစ်ပြီးတော့ ပြိုကွဲခြင်းက နတ်ဆိုးတည်ရှိခြင်းရဲ့အမှတ်သင်္ကေတဖြစ်ပါတယ်။ စည်းလုံးရင် ငြိမ်းချမ်းခြင်းတည်းလုံးတွေကို အတူတကွ နားဆင်နိုင်မှာဖြစ်ပါတယ်။ ပြိုကွဲနေရင်တော့ ဖရိုဖရဲတစ်ကိုယ်တည်း ဘဝခရီးဆက်ကြရမှာြဖစ်သလို မလုံမခြုံနဲ့ဖြစ်နေတတ်ပါတယ်။ တစ်ဦးတည်းခရီးသွားရတာထက်အဖော်နဲ့ခရီးသွားရတာက ပိုပျော်ဖို့ကောင်းသလို ဘေးကင်းလုံခြုံသလိုခံစားရတတ်ပါတယ်။ ဒီတော့ မိသားစုအတွင်းမှာပဲဖြစ်ဖြစ်၊ အဖွဲ့အစည်းအတွင်းမှာပဲဖြစ်ဖြစ်၊ တိုင်းပြည်အတွင်းမှာပဲဖြစ်ဖြစ် စည်းလုံးခြင်း၊ ငြိမ်ချမ်းခြင်းတွေရှိနေရင် လူ့ဘဝက ပျော်ရွှင်စရာကောင်းမှာဖြစ်ပါတယ်။ ပြိုကွဲနေရင်တော့ အားလုံး စိတ်ညစ်ရ၊ ဒုက္ခဆင်းရဲခြင်းတွေရောက်ကြရမှာဖြစ်ပါတယ်။

ဝိညာဉ်ရေးဖခင်တစ်ယောက်ပြောခဲ့တဲ့စကားတစ်ခွန်းကိုပြန်ဝေမျှပေးရရင် “စစ်မှန်တဲ့ပျော်ရွှင်ခြင်းဟာ ဘုရားတည်ရှိခြင်းရဲ့ အမှတ်လက္ခဏာဖြစ်တယ်” လို့ဆိုပါတယ်။ ပျော်ရွှင်ခြင်းတွေရရှိဖို့ အခြားသူများနဲ့စည်းစည်းလုံးလုံးနေထိုင်သွားနိုင်အောင်ဆက်လက်ကြိုးစားအားထုတ်သွားကြပါစို့..တိုင်းပြည်အတွင်းစည်းလုံးခြင်းငြိမ်းချမ်းခြင်းတွေရှိနေရင် တိုင်ပြည်ဟာအေးချမ်း သာယာနေမှာြဖစ်သလို ပြည်သူပြည်သားတွေဟာလည်းပဲ လုံခြုံတဲ့ဘဝ၊ ပျော်ရွှင်တဲ့ဘဝကိုရရှိပိုင်ဆိုင်ကြမှာပဲဖြစ်ပါတယ်။ အယောက်စီတိုင်းကိုဘုရားရှင်ကောင်းချီးပေးပါစေ။ အာမင်း။